आगो
जीवन भोग्नु भन्दा पहिले नै
जीवनलाई आगो देखेर उसको भय
झनै आगो भएर दन्केको थियो
आगो जसले उसलाई सँधै पछ्याइ रहेको छ
आगोबाट उसले मुक्ति पाउन सकेको छैन
आगो उसको नियति हो
आगो उसको खाली पेट
आगो उसको नाङ्गो आँग
आगो उसको टाउको माथिको नाङ्गो छत
चारैतिर आगो नै आगो
आगोको बस्तीमा बसेर
उसले आगोसँग संघर्ष गर्नु छ
आगो निभाउनु छ
तर निर्दयी आगो झन दन्किंदै छ
उसको नजीक नजीक लम्मकिदै
आगो अरुलाई खरानी बनाउने आफ्नो प्रकृति अनुरुप
उसलाई खरानी पार्न उद्दत छ
उ विवश भएर हेर्दै छ
आफू नजीक पुग्नै आँटेको
दन्दनी बल्दै गरेको आगो
विश्वराज अधिकारी
No comments:
Post a Comment